ضلع رام بن کے رامسو علاقے میں نوجوان کی گمشدگی پر کشیدگی برقرار، احتجاج کے بعد تحقیقات تیز، 4 افراد گرفتار

ضلع رام بن کے رامسو علاقے میں نوجوان کی گمشدگی پر کشیدگی برقرار، احتجاج کے بعد تحقیقات تیز، 4 افراد گرفتار

بانہال/رام بن: ضلع رام بن کے رامسو علاقے میں پیر کے روز بھی کشیدگی برقرار رہی جب 25 سالہ نوجوان تنویر احمد چوپان، ساکن پوگل، اتوار کی شام مبینہ طور پر کچھ افراد سے بچنے کی کوشش میں نالہ بشلری میں چھلانگ لگانے کے بعد لاپتہ ہو گیا۔

واقعے کے بعد علاقے میں شدید غم و غصہ پایا گیا، جس کے تحت مقامی لوگوں نے مکرکوٹ میں بی ڈی او دفتر کے قریب جموں-سری نگر قومی شاہراہ پر احتجاجی دھرنا دیا۔ پیر کی صبح مرد و خواتین کی بڑی تعداد نے سڑک پر بیٹھ کر ایک گھنٹے سے زائد وقت تک ٹریفک معطل رکھا۔

پولیس نے اس معاملے میں ایف آئی آر نمبر 26/2026 تھانہ رامسو میں درج کر کے چار افراد کو گرفتار کیا ہے۔ گرفتار شدگان کی شناخت سرجیت سنگھ، سندیپ سنگھ، دگ وجے سنگھ اور کیول سنگھ کے طور پر ہوئی ہے۔ حکام کے مطابق ملزمان کو بانہال پولیس اسٹیشن میں رکھا گیا ہے۔

دو دہائی بعد سی آر پی ایف کانسٹیبل کو جموں و کشمیر اور لداخ ہائی کورٹ سے ملی راہت، برطرفی کالعدم قرار

مقامی لوگوں کے مطابق تنویر احمد چوپان جموں سے اپنے آبائی گاؤں منڈکھال، پوگل جا رہا تھا کہ مکرکوٹ کے قریب مبینہ طور پر ایک گروہ نے اس کا پیچھا کیا اور تشدد کا نشانہ بنایا۔ جان بچانے کی کوشش میں اس نے ٹنل نمبر 5 کے قریب نالہ بشلری میں چھلانگ لگا دی، جس کے بعد سے وہ لاپتہ ہے۔

احتجاجی مظاہرین نے واقعے میں ملوث تمام افراد کی گرفتاری اور ریسکیو آپریشن فوری طور پر دوبارہ شروع کرنے کا مطالبہ کیا۔ ان کا کہنا تھا کہ اتوار کی رات اندھیرے کے باعث آپریشن روک دیا گیا تھا۔ مظاہرین نے شفافیت پر سوال اٹھاتے ہوئے ایف آئی آر کی کاپی فراہم کرنے کا بھی مطالبہ کیا۔

واقعے کی تحقیقات کے لیے ایس ایس پی رام بن ارون گپتا نے ایک خصوصی تحقیقاتی ٹیم (SIT) تشکیل دی ہے، جس کی سربراہی ایس ڈی پی او بانہال سریندر سنگھ بلوریا کر رہے ہیں۔ ایڈیشنل ایس پی مجیب الرحمٰن اور دیگر اعلیٰ حکام نے موقع پر پہنچ کر مظاہرین سے بات چیت کی اور ٹریفک بحالی کی اپیل کی۔

میڈیا سے بات کرتے ہوئے سریندر سنگھ بلوریا نے کہا کہ کیس کے تمام پہلوؤں کی باریک بینی سے تحقیقات کی جا رہی ہیں اور عوامی الزامات کو بھی سنجیدگی سے لیا جائے گا۔

انہوں نے بتایا کہ نیشنل ڈیزاسٹر ریسپانس فورس (NDRF) کی ٹیم مکرکوٹ پہنچ چکی ہے اور ریسکیو آپریشن دوبارہ شروع کر دیا گیا ہے۔

دریں اثنا، امن و امان برقرار رکھنے کے لیے ضلع رام بن میں انٹرنیٹ سروس کی رفتار محدود کر دی گئی ہے۔

ادھر، ٹریڈرز فیڈریشن بانہال کی جانب سے دی گئی ہڑتال کی کال کو انتظامیہ کی یقین دہانی کے بعد واپس لے لیا گیا۔

حکام کا کہنا ہے کہ تحقیقات جاری ہیں اور لاپتہ نوجوان کی تلاش کے لیے ہر ممکن کوشش کی جا رہی ہے۔