جموں و کشمیر کو ریاستی درجہ بحال کرنا ہماری حکومت کی اولین ترجیح ہے: وزیرِ اعلیٰ عمر عبداللہ

جموں و کشمیر کو ریاستی درجہ بحال کرنا ہماری حکومت کی اولین ترجیح ہے: وزیرِ اعلیٰ عمر عبداللہ

جموں و کشمیر، 11 مئی 2026 (وی او ایم نیوز): جموں و کشمیر کو ریاستی درجہ بحال کیے جانے کے حوالے سے امید کی ایک نئی کرن اس وقت سامنے آئی جب وزیر اعلیٰ عمر عبداللہ نے اشارہ دیا کہ اس معاملے پر جلد مرکزی وزیر داخلہ امت شاہ کے ساتھ بات چیت ہوگی۔

عمر عبداللہ نے کہا کہ جموں و کشمیر کی ریاستی حیثیت کی بحالی ان کی حکومت کی سب سے بڑی ترجیح ہے۔ انہوں نے بتایا کہ اس حوالے سے عمل جاری ہے، تاہم یہ مسئلہ ایک ہی ملاقات یا ایک ہی مرحلے میں حل نہیں ہو سکتا۔

جموں و کشمیر حکومت کا پہلگام میں سیاحوں کے لیے کیو آر کوڈ سسٹم کا آغاز

انہوں نے کہا کہ اس معاملے کو اس سے پہلے بھی مرکزی حکومت کے ساتھ اٹھایا جا چکا ہے اور انہیں امید ہے کہ مسلسل رابطے اور بات چیت کے ذریعے پیش رفت ممکن ہوگی۔

وزیر اعلیٰ نے واضح کیا کہ مجوزہ ملاقات صرف ریاستی درجہ کی بحالی تک محدود نہیں ہوگی بلکہ اس میں دیگر اہم معاملات بھی زیر بحث آئیں گے، جن میں ریزرویشن پالیسی، بزنس رولز، اور وہ معاملات شامل ہیں جو لیفٹیننٹ گورنر کی جانب سے مرکز کو بھیجے جاتے ہیں۔

جموں و کشمیر کی کئی اپوزیشن جماعتوں نے بھی عمر عبداللہ کی حکومت سے مطالبہ کیا ہے کہ وہ ریاستی درجہ کی بحالی کے مطالبے کو مزید تیز اور مؤثر انداز میں آگے بڑھائے۔

ٹیلی کام اختیارات سے متعلق سوال پر عمر عبداللہ نے کہا کہ یہ مکمل طور پر سکیورٹی اسٹیبلشمنٹ کے دائرہ اختیار میں آتا ہے، جس کی نگرانی اس وقت یونین ٹیریٹری انتظامیہ کے تحت لیفٹیننٹ گورنر کے پاس ہے۔